प्रभुले बेच्यो मलेसियाको रेमिटेन्स कम्पनी

काठमाडौं: प्रभु मनी ट्रान्सफरले मलेसियामा रहेको आफ्नो कम्पनी प्रभु मनी ट्रान्सफर एसडीएन बीएजडी डीजी डटकमलाई बिक्री गरेको छ। प्रभुले सन् २००७ मा मलेसियामा यो कम्पनी स्थापना गरेको थियो। कम्पनी डीजी डटकमलाई बिक्री गर्ने सबै प्रक्रिया पूरा गरेको प्रभु निकट स्रोतले जानकारी दियो। 'बिक्रीका विषयमा सबै डिल मिलिसकेको छ',स्रोतले भन्यो, 'डिसेम्बरको अन्तिमसम्ममा बिक्रीको विषय बाहिर आउनेछ।' मलेसियामा रहेको प्रभु मनी ट्रान्सफर खरिद गर्न लागेको डीजी डटकम मोबाइल सेवा प्रदायक कम्पनी हो। प्रभु मनी ट्रान्सफरलाई खरिद गर्न डीजीलाई मलेसियाको बैंक अफ नेगाराले समेत अनुमति दिएको छ। बैंक अफ नेगरा मलेसियाको केन्द्रीय बैंक हो। प्रभु मनी ट्रान्सफरलाई मलेसियामा रेमिटेन्स सेवा दिन मलेसियाको केन्द्रीय बैंकले लाइसेन्स दिएको थियो। प्रभुले मलेसियामा रहेको कम्पनी बिक्री गरेको विषयमा मलेसियाका सञ्चारमाध्यमले पनि समाचार प्रकाशित गरेका छन्। मलेसियाको आर्थिक पत्रिका 'मलेसियन रिजर्भ'ले डिजीले प्रभु मनीट्रान्सफर खरिद गर्न लागेको र यसका लागि केन्द्रीय बैंकलेसमेत सहमति दिएको समाचार प्रकाशित गरेको छ।'कम्पनी खरिदबिक्री प्रक्रिया चलिरहेको छ', प्रभुको मलेसियाकी कार्यकारी निर्देशक सुजाता शाक्यले मलेसियन पत्रिका मलेसियन रिजर्भसँगको कुराकानीमा भनेकी छन्, 'दुई कम्पनीबीच खरिदबिक्रीका विषयमा कुराकानी भएको अन्य विषय मिलेको छैन।' नोबेम्बर १७ मा मलेसियन रिजर्भले डीजीडटकमले प्रभु मलेसिया खरिद गर्न लागेको समाचार प्रकाशित गरेको थियो। यस्तै नोबेम्बर २० मा मलेसियाको केन्द्रीय बैंकले खरिदबिक्री गर्न अनुमति दिएको समाचार सार्वजनिक गरेको छ।
'२० करोड आरएमबीमा प्रभु र डीजीडटकमबीच कम्पनी खरिदबिक्री प्रक्रिया अगाडि बढेको छ', समाचारमा भनिएको छ। नेपाली विनियमदर अनुसार यसको मूल्य ५० करोड रुपैयाँ हुन्छ।मलेसियामा रहेको रेमिटेन्स कम्पनी आईएमई मलेसियालाई रिया मनी ट्रान्सफरलाई बिक्री गरेको थियो। यद्यपि, आइएमईले मलेसियामा रहेको आफ्नो कम्पनी र रियाबीच मर्जर सम्झौता भएको विज्ञप्तिमार्फत जनाएको थियो। नेपालमा रेमिटेन्स भित्र्याउने कम्पनीमा आईएमई पहिलो नम्बरको कम्पनी हो भने प्रभु मनी ट्रान्सफर दोस्रो नम्बरको कम्पनी हो। २० करोड आरएमबीमा कारोबार गर्ने सम्झौता भएको छ। दुवै कम्पनीबीच बैंकिङदेखि हरेक कारोबारमा कर्पोरेट प्रतिस्पर्धा देखिन्छ।प्रभु मनिट्रान्सफर मलेसियाको अध्यक्षमा देवी भट्टचन रहेका छन्। कम्पनी वेवसाइटमा दिएको जानकारी अनुसार अन्य सञ्चालकमा सुजाता शाक्य कार्यकारी निर्देशक छन्। डाटो सुङ क्वाङ चुन व्यवसायिक सञ्चालकको रूपमा रहेका छन्। प्रमुख कार्यकारी अधिकृतमा डाटिन अजम अदम करिम रहेकी छन्।मलेसियामा पछिल्लो समय रेमिटेन्सको कारोबार सम्बन्धी नीतिमा परिवर्तन भएको कारण आईएमई र प्रभु बाहिरिएको हुन सक्ने टिप्पणी एक रेमिट कम्पनीका प्रमुखको छ। ‘मलेसियाबाट आउने रेमिटेन्स कारोबारमा दुवै कम्पनीको अधिपत्य थियो’,ती अधिकारीले भने,‘ मलेसियाको व्यवसायमा प्रतिफल कम आउने कारणबाट त्यहाँबाट बाहिरिएको हुनसक्छ।' रेमिटेन्स र बैंकिङ क्षेत्रमा केन्द्रीय रहेको प्रभु ग्रुप पछिल्लो समय नेपालमा अन्य व्यवसायिक क्षेत्रमा समेत हात हालेको छ। गतवर्ष किष्ट बैंकलाई लिएर प्रभु बैंक सञ्चालन गरेको छ भने ग्रान्ड बैंक पनि लिने तयारीमा प्रभु रहेको छ। यस्तै बिमा क्षेत्रको एलाइन्स इन्सुरेन्सको पनि बहुमत सेयर खरिद गरेर प्रभुले गतवर्षदेखि प्रभु इन्सुरेन्सको नामबाट कारोबार गर्दै आएको छ। यो वर्षदेखि प्रभु ग्रुपले हवाई क्षेत्रमा समेत प्रवेश गरेको छ। पछिल्लो एकवर्षदेखि मलेसियाको रिंगिटको मूल्य ओरालो लाग्दै गएको छ। यसका कारण मलेसियाबाट आउने रेमिटेन्स घट्दै गएको छ।